Мисс М.Цэвэлмаа "Зорилго бүхий гоо сайхан" номинацид шилдэг 10-т багтжээ

Английн Лондон хотноо зохион байгуулагдаж буй дэлхийн гоо бүсгүй шалгаруулах 69 дэх удаагийн тэмцээнд Мисс М.Цэвэлмаа эх орноо төлөөлөн оролцож байна.

Тэрбээр, "Дэлхийн мисс 2019" тэмцээний зорилго бүхий гоо сайхны номинацийн шалгаруулалтад шилдэг 10-т багтжээ.

Үүнээс гадна алдарт “The Hu” хамтлагийн “Yuve Yuve”дууны ая дээр морин хуур, хөөмий, Монгол бүжгийн хосолсон үзүүлбэрийг үзүүлэн, авьяасын шалгаруулалтад Монгол Улс шилдэг 20 орны тоонд багтсан юм. Өчигдөр авьяасын шалгаруулалтын эцсийн шат өндөрлөжээ.

Мөн "Head to head challenge" буюу ярилцлагын шалгаруулалтад багийнхаа ялагч болж,  шилдэг 20-т шалгарсан байна. 

Мисс М.Цэвэлмаа нь Анагаахын шинжлэх ухааны үндэсний их сургуулийг өнгөрөгч хавар хүний их эмч мэргэжлээр төгссөн бөгөөд “Монголын сайхан бүсгүй-2018” уралдааны есөн эрдэнийн өргөмжлөлт бүсгүйчүүдийн “Мөнгөн эрдэнэ”-ийн өргөмжлөлийн эзнээр тодорч байжээ. 

Монгол Улс www.missworld.com сайтын олон нийтийн санал асуулгаар 140 орноос эхний зургаад жагсаж байна. Энэ шалгуурт түрүүлснээр топ 30-д орох боломжтой.

Тиймээс арванхоёрдугаар сарын 14-нийг хүртэл мисс М.Цэвэлмааг дэмжиж, идэвхтэй саналаа өгөхийг уриалж байна.

Хэрхэн саналаа өгөх вэ?
1.Та гар утас болон компьютерээс www.missworld.com хаяг руу нэвтэрч орно.
2. Вэбсайтын баруун дээд буланд Log-in товчийг дарна.
3.Та вэбсайт руу Facebook, Instagram, Google хаягийн аль нэгээр нэвтэрнэ.
4. Vote хэсэг дээр дарж Tsevelmaa Mandakh гэж хайснаар оролцогчоо олно.
5. Vote товч дээр дарж саналаа өгнө.