Хүүхдийн номыг 30-60 хувийн хямдралтай худалдаалах өдөрлөг болж байна 0 Tweet
“Эрүүл мэндийг хохироох хор бус Эрдэм оюуныг тэтгэх ном бэлэглэе” уриатайгаар хүүхдийн уран бүтээлч, зохиолч нар нэгэн дор чуулж байна. Монголын хүүхдийн уран бүтээлчдийн “Эвт үзэг” төв болон Монголын хүүхдийн төв номын сан хамтран зохион байгуулж байгаа “Хүүхдийн зохиолчтой хамт” нэртэй арга хэмжээ өнөөдөр Монголын хүүхдийн төв номын санд нээлтээ хийлээ.
Нээлтийн үеэр номонд дуртай бяцхан уншигчид өөрсдийн ая дуугаар зохиолч ах, эгч нартаа мэндчилгээ дэвшүүлж, Хүүхдийн төв номын сан “Ээжээ номын санд очъё” шинэ номын дээжээр уран бүтээлчдэд бэлэг барьжээ.
Хүүхэд бүрийн дуртай шинэ жилийн баяраар эрүүл мэндэд хортой амттан биш харин оюун ухааныг нь тэлэх ном бэлэглэхийг эцэг эхчүүдэд уриалж буй уг өдөрлөг хоёр өдөр үргэлжилнэ. Энэ үеэр уран бүтээлч, зохиолчид номоо 30-60 хувь хямдруулан худалдаалах юм.
Мөн хүүхэд багачууд дуртай шүлэг, дуугаа уншиж, дуулж болох чөлөөт тайз, нээлттэй микрофон, өвлийн өвөөд илгээх захидлын уралдаан, зураг зурж, цаасаар урлаж болох “Уран бүтээлч” булан гээд олон сонирхолтой арга хэмжээг зохион байгуулж буй.
Бичсэн номынх нь талаар зохиолчтой ярилцаж, гарын үсгийг нь авах, хамт зураг даруулан “Амттай-ном” сугалааг бэлгэнд авч өдрийг хөгжилтэй өнгөрүүлэх боломжийг хүүхдийн уран бүтээлч нар олгож байна.
Хоёр өдөр үргэлжлэх арга хэмжээний үеэр ээж аавуудад зориулсан “Хүүхдийн уншлагад эцэг эхийн оролцоо”, “Уншлагаар хүүхдийн сэтгэхүйг хөгжүүлэх нь” зэрэг сонирхолтой илтгэл, чөлөөт хэлэлцүүлэг хийх бөгөөд зохиолч Б.Ганчимэг, Ш.Солонго нарын олон уран бүтээлчийн шинэ номын нээлт болно.
Эх сурвалж: БСШУСЯ