Өмнөд Солонгост нэгэн эмэгтэй виртуал бодит байдалд нас барсан охинтойгоо "уулзжээ"

Өмнөд Солонгосын Жан Жи Сун гэх нэгэн эмэгтэйн охин 2016 онд цус багадах өвчнөөр нас барсан байна. Найон гэж дууддаг байсан охин дөнгөж 7 настай байжээ.

Виртуал бодит байдлын инженерүүд болон хөгжүүлэгчид охиныг дөрвөн жилийн дараа "амилуулжээ". Жан Жи Сун бүсгүй охинтойгоо ярилцаж чадсанаас гадна, гараас нь барьж, төрсөн өдрийг нь лаа үлээлгэн тэмдэглэсэн байна. Энэ сэтгэл хөдөлгөм мөчийг “Би чамтай уулзсан” хэмээх баримтат киногоор үзүүлжээ.

Нас барсан хүмүүсийг тоон ертөнцөд “амилуулах нь” төрөл төрөгсдийнх нь эрүүл мэндэд сөргөөр нөлөөлөх зэрэг гэнэтийн үр дагаварт хүргэж болзошгүй бөгөөд энэхүү кино нь VR технологийг ёс зүйтэй ашиглах тухай асуудлыг дахин хөндөж байна гэж мэргэжилтнүүд үзэж байгаа аж. 

Гэхдээ Жан Жи Сун охинтойгоо ядаж виртуал бодит ертөнцөд уулзах боломж олдсонд аз жаргалтай байна гэж ярьжээ. “Энэ нэвтрүүлгийн дараа олон хүн Найоныг санана гэж найдаж байна” гэж тэрбээр нэмж хэлсэн байна.