Монголд 128 Ганболдын Ганзориг бий

Улсын бүртгэлийн ерөнхий газарт Ганболдын Ганзориг буюу эцэг/эхийн нэр, өөрийн нэр нь ижил 128 иргэн бүртгэлтэй байдаг талаар УБЕГ-ын дарга Б.Баасандорж мэдээллээ.

Нийслэлийн хэмжээнд эцэг/эхийн нэр, өөрийн нэр адилхан 118419 иргэн байдаг бол орон нутагт энэ тоо 131712-т хүрдэг аж.

Мөн регистрийн дугаарын сүүлийн хоёр орноос бусад нь адилхан буюу эцэг/эхийн нэр, өөрийн нэр, төрсөн он, сар, өдөр адилхан 2200 иргэн байдаг аж.

Ихэр хүүхдэдээ адилхан нэр өгсөн тохиолдол байдаг учраас нэг хүн хоёр газар сонгууль өгсөн юм шиг харагдах тохиолдол Ерөнхийлөгчийн сонгуулийн үеэр ажиглагдаж байсан гэдгийг УБЕГ-ын дарга Б.Баасандорж өнөөдрийн Төрийн байгуулалтын байнгын хорооны хуралдааны үеэр хэлсэн юм.

2012 оноос биеийн давхцалгүй өгөгдөл буюу хурууны хээгээр санал өгч эхэлснээс хойш нэг хүн хоёр буюу түүнээс дээш удаа санал өгөх боломж огт байхгүй гэв.

Сонирхуулахад та ЭНД дарж өөртэйгөө ижил нэртэй хэдэн иргэн бүртгэлтэй байгааг харах боломжтой. Гэхдээ энд зөвхөн таны нэртэй ижил нэр харагдахаас биш овгоор ялгадаггүй болно.