С.Бямбацогт: Сонгуулийг 26 тойргоор явуулахаар ярилцсан

УИХ-ын сонгуулийн тухай хуулиар 2020 оны сонгуулийг олон мандаттай мажоритар тогтолцоогоор явуулахаар болсон. Тэгвэл улсыг хэчнээн тойрогт хувааж, хаана, хэдэн мандат хуваарилахыг ирэх сарын 1-нээс өмнө тогтоох юм.

Энэ талаар УИХ-ын Төрийн байгуулалтын байнгын хорооны дарга С.Бямбацогт хэвлэлийнхэнд мэдээлэл өгөх үеэрээ 26 тойрогтой байхаар ярилцаж байгааг хэллээ. Тэрбээр “Нэг мандаттай аймгуудыг хоёр мандаттай болгохоор ярилцаж байна. Дундговь, Сүхбаатар, Говь-Алтай, Булган  аймаг нэг мандаттай. Тиймээс нийслэлийн 28 мандатаас дөрвийг нь нэг мандаттай аймгууд руу шилжүүлэх тухай ярилцсан. Гэхдээ одоогоор эцэслэн шийдээгүй байна. Одоогийн байдлаар 26 тойрогтой байхаар ярилцаж байгаа” гэв.