Иргэдийн шилжилт хөдөлгөөнийг энэ сарын 1-нээс эхлэн зогсоов
Ирэх зургаадугаар сард УИХ-ын ээлжит сонгууль болохтой холбогдуулан иргэний нэг нэгжээс нөгөөд шилжин суурьших хөдөлгөөнийг өнөөдөр буюу хоёрдугаар сарын 1-нээс түр хугацаанд зогсоож, санал хураалт дууссаны маргааш нээнэ.
Монгол Улсын Их Хурлын сонгуулийн тухай хуулийн 25 дугаар зүйлийн 25.1-д “Иргэний засаг захиргааны нэг нэгжээс нөгөөд шилжин суурьших хөдөлгөөнийг ээлжит сонгуулийн жилийн хоёрдугаар сарын 1-ний өдрөөс эхлэн зогсоож, санал авах өдрийн дараах өдрөөс сэргээнэ” гэж заасан байдаг.
Улсын бүртгэлийн ерөнхий газрын дарга Б.Баасандорж “Улсын бүртгэлийн байгууллага 2012 оны УИХ-ын ээлжит сонгуулиас эхлэн биеийн давхцахгүй өгөгдөл буюу иргэн хурууны хээгээр бүртгүүлж, сонгуульд санал өгөх системийг нэвтрүүлж эхэлсэн. Энэ удаагийн сонгуулиар ч мөн хурууны хээгээр санал авна. Мөн иргэний засаг захиргааны нэг нэгжээс нөгөөд шилжин суурьших хөдөлгөөнийг хуулийн дагуу 2020 оны хоёрдугаар сарын 1-ний өдрөөс эхлэн зогсоож, санал авах өдрийн дараах өдрөөс сэргээнэ” гэв.
