БНСУ: Вирусын халдвар огт гараагүй Монгол Улсын нууц юу вэ?

БНСУ-ын Жунан Илбу сонинд Монгол Улсын тухай сайшаан бичсэн нийтлэлийг Күүкмин Их Сургуулийн багш Ц.Өнөрзаяа орчуулсныг хүргэж байна.

-Хятад улстай 5000 км газраар хиллэдэг боловч халдвар авсан хүний тоо 0. Монгол Улсын гайхамшгийн нууц-

Хятад улстай 5000 км газраар хиллэдэг Монгол улсын хувьд энэ сарын 22-ны өдрийн байдлаар коронавирусын халдвар тээгч гараагүй байна. Энэ нь асар том эдийн засгийн хохирол амсахаас үл айн дээд зэргийн хүчтэй хамгаалалтын бодлогын үр дүн юм.

Энэ сарын 23-ны өдөр Асахи сонин болон МҮОНРТ зэрэг мэдээллийн байгууллагын бичсэнээр Монгол Улсын Засгийн газар энэ сарын эхээс Хятад иргэдийг нэвтрүүлэхийг хориглон, Хятад руу ирж очдог нислэгээ хүртэл зогсоосон байна. 

Хятад улс руу нүүрсний экспортоо хүртэл дараа сарын 2-ныг хүртэл зогсоожээ. Энэ нь тээврийн жолооч нарыг халдвар авахаас сэргийлсэн бодлого юм. Монгол улс нь хамгийн том худалдааны харилцагч болох Хятад улстай хийдэг экспортын тал шахам хувийг эзэлдэг нүүрсэндээ түшиглэдэг эдийн засагтай боловч хамгийн том арга хэмжээгээ авсан нь энэ юм. 

Мөн өөр бусад эрсдэлтэй шийдвэрийг ч гаргав. Өнгөрсөн 12-ны өдөр Монгол Улсын Ерөнхийлөгч Халтмаагийн Баттулга нь 24-ны өдөр болох уламжлалт "Цагаан сар"-ын баяртай холбоотой арга хэмжээг тэмдэглэхгүй байх шийдвэр гаргасан тухайгаа танилцуулсан юм.  Ард түмэндээ уламжлалт шинэ жилийн баяраар харилцан зочилж золгохгүй байхыг анхааруулсан нь энэ юм. 

Монгол Улсын Засгийн газар дунд сургуулийн улирлын амралтыг сунган, дэлхий даяар хомсдолд орсон маскны үйлдвэрлэлд цэрэг дайчдыг дайчлан ажиллуулж байна. Тэд мөн онцгой байдлын үеийн хорио цээрийн байгууламжуудаа яаралтай хийж байна гэж Асахи дамжуулав. 

Орчуулсан Ц.Өнөрзаяа

(Күүкмин Их Сургуулийн багш)

Эх сурвалж: https://mnews.joins.com/article/23713176