Нийтийн тээврийн 930 гаруй автобусыг тогтмол ариутгаж байна
Коронавирусний халдвараас урьдчилан сэргийлэх, урин дулаан улирал эхэлсэнтэй холбогдуулан орчны халдвар хамгаалал, эрүүл ахуйн нөхцөлийг сайжруулж нийтийн автобуснуудад өглөө болон оройн ээлж солих үеэр халдваргүйтгэл, ариутгалыг тогтмол хийж байна.
Нийтийн тээврийн 930 гаруй автобусыг тогтмол ариутгаж, нийслэлийнхэндээ өдөр бүр цэвэрхэн автобусаар үйлчлэх зорилттой ажиллаж байгаа аж. Мөн автобусанд гар ариутгагч байршуулж, жолооч нар амны хаалтыг тогтмол зүүж байгааг үйлчлүүлэгчид талархаж байна.
Автобусны цэвэрлэгээ, ариутгал болон зорчигчид амны хаалттай үйлчлүүлж байгаа эсэхэд 24 байцаагч өдөр бүр хяналт тавьж байгаа юм. Халдварын дэгдэлттэй үе гэлтгүй цаашид иргэд цэвэрхэн автобусаар үйлчлүүлэх боломжийг бүрдүүлэхийн тулд нийслэл, НТҮГ, автобус баазууд автобусны ариутгал, цэвэрлэгээг тогтмол хийж, аливаа эрсдэлээс урьдчилан сэргийлэхэд анхаарч байна.
