Гарааны бизнесийг дэмжих “Creative Retail Store” төслийн нээлт болно

Гарааны компани, үйлдвэрлэгчид, бизнес эрхлэгчдийг дэмжих зорилготой “Creative Retail Store” төслийн албан ёсны нээлт өнөөдөр болно.

“Залуу бизнес эрхлэгчдийн зөвлөгөөн” ТББ-аас нийгмийн хариуцлагын хүрээнд хэрэгжүүлж буй уг төсөл нь гарааны компани, үйлдвэрлэгч нарыг худалдаа, үйлчилгээ явуулах ээлтэй, уян хатан нөхцөлөөр хангаж, олон улсын стандартад нийцсэн томоохон төвд түрээсийн төлбөргүй орон зай санал болгож буйгаараа онцлог юм.  

Төсөл хэрэгжүүлэгчид өсөх ирээдүйтэй, үндэсний үйлдвэрлэгч гарааны компаниудыг хамруулж, бизнест нь бодит дэмжлэг үзүүлэх зорилго тавьж буй бөгөөд энэ хүрээнд 12 компани шалгарсан байна. 

Тодруулбал, гарааны бизнес эрхлэгч “Моду Лабс” ХХК, “Эгүлэн Пос” ХХК, “Ээлтэй ертөнц” ТББ, “Одь Тан” ХХК, “Амин чанар уураг” ХХК, “Лансэрс” ХХК, “Гөү Прогресс” ХХК, “Монком мэйд”, “GeekMonkey”, “Мон-Чик” урлан, “Go Grand” тавилга, “Баян хийц” ЗБН нь төслийн ашиг шимийг хүртэх болжээ. 

Төсөлд оролцсоноор старт-ап, гарааны бизнесийг хөгжүүлэх чиглэлээр ур чадвар, мэдлэг нэмэгдүүлэх сургалт, семинарт хамрагдах, шинэлэг бүтээгдэхүүн үйлчилгээгээ олон нийтэд сурталчлах, таниулах үйл ажиллагааг хамтран явуулах, Монголдоо төдийгүй олон улсад үйл ажиллагаагаа явуулах боломжуудыг нээх зэрэг давуу талтай гэдгийг төсөл хэрэгжүүлэгчид онцолж байна. 

“Creative Retail Store” төслийн нээлт өнөөдөр 14.00 цагаас Зайсан Хилл цогцолборт болно.