Шатахууны үнийг литр тутамд 100 төгрөгөөр дахин бууруулна

АИ-80, АИ-92 автобензин болон дизелийн түлшний жижиглэнгийн үнийг энэ сарын 15-наас эхлэн литр тутамд 100 төгрөгөөр бууруулахаар болсныг Засгийн газрын ХЭГ-аас мэдэгджээ.

Засгийн газрын ХЭГ, УУХҮЯ-аас  өгсөн чиглэлийн дагуу АМГТ-ны газраас нефть импорлогч компаниудтай зөвшилцсөний үндсэн дээр дээрх шийдвэрийг гаргажээ. Учир нь дэлхийн зах зээл дэх түүхий тосны үнэ, Монгол Улсад хилээр оруулж ирж байгаа импортын нефтийн бүтээгдэхүүний үнэ өмнөх сараас тус тус буураад байгаа юм. Монгол Улсын сайд, Засгийн газрын ХЭГ-ын дарга Г.Занданшатар АМГТ-ны газрын Газрын тосны асуудал хариуцсан орлогч дарга Ц.Эрдэнэбаяртай уулзаж цаг үеийн мэдээлэл сонссон юм. 2018 оны 12 дугаар сараас эхлэн шатахууны үнийг бууруулах талаар импортлогч компаниудтай зөвшилцөн жижиглэнгийн үнийг  шат дараатай бууруулж, өргөн хэрэглээний бензин, түлшний үнийг ийнхүү  литр тутамд нийт 250 төгрөгөөр хямдруулаад байна.

Засгийн газрын ХЭГ-ын дарга Г.Занданшатар "Эрдэнэс Монгол" ХХК-ийн дэд дарга О.Одбаяр, судлаач Б.Солонгоо нарыг мөн өнөөдөр хүлээн авч уулзан Асгатын мөнгөний ордыг эдийн засгийн эргэлтэнд оруулах талаар авч хэрэгжүүлэх арга хэмжээний төлөвлөгөөг боловсруулах ажлын явцын мэдээллийг сонсов гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.