Acne Studios брэндийн намар-өвөл 2022 эрэгтэй цуглуулга
Oversize загварын бомбер, кардиган, өргөн мөртэй пальто зэрэг нь Acne Studios брэндийн нэрийн хуудас гэж хэлэхэд хилсдэхгүй. Тэгвэл дизайнер Йонни Йоханссон өөрийн өссөн хойд Шведийн нүүдэлчдийн хувцаслалтаас сэдэл авч намар-өвөл 2022 улирлын эрэгтэй цуглуулгаа бүтээжээ. Цуглуулгад цээж хүрсэн өндөр суудалтай өмднүүд, нэхмэл материал, этгээд хэлбэрийн гуталнууд, байгалийн өнгө, олон давхар загварууд түлхүү давамгайлсан байна. Дизайнерын онцолсноор тэрээр шинэ цуглуулгаараа дамжуулан хотын оршин суугч болон хөдөө орон нутгийн иргэдийн амьдралын хэв маягийн ялгааг харуулахыг зорьсон гэнэ. Тиймдээ ч дийлэнх төрхүүдэд хоорондоо зохицолдохгүй хувцасны элементүүд анзаарагдах болно. Ерөнхийдөө цуглуулгын бүх хувцаснууд бага зэрэг замбараагүй, хайхрамжгүй хэв маягтай байлаа.
Түүнчлэн шинэ цуглуулгын энгэрийн зүүлт, ээмэг болон хүзүүний зүүлтийг зураач Жесси Ривз урласан байна. Харин цуглуулгын этгээд стилийн гуталнуудыг бүтээхийн тулд Acne Studios хойд Шведийн үндэсний гутал үйлдвэрлэгч Kero брэндтэй хамтарчээ. Сонирхолтой нь, Йонни Йоханссон яг л цуглуулгад багтсан шиг шовгор хоншоортой гутлыг багадаа маш ихээр үзэн яддаг байсан ч тус гутланд ахин нэг удаа боломж өгөхөөр шийдэж, шинэ цуглуулгадаа багтаасан байна.
Эх сурвалж: buro247.mn
