Венесуэл Колумбиас дипломат харилцаагаа тасалж байна гэж мэдэгджээ

Венесуэлтэй хил залгаа оршдог Колумби улсаас дипломат болон улс төрийн харилцаагаа тасалж байна гэж Венесуэлийн Ерөнхийлөгч Николас Мадуро бямба гарагт мэдэгдэв. Тэрбээр энэ тухай нийслэл Каракас хотод цугласан Засгийн газрыг дэмждэг жагсагчдад хандан хэлжээ."Колумбийн Элчин сайдын яамны ажилтнууд 24 цагийн дотор Венесуэлийг орхих ёстой" гэж Н.Мадуро нэмж хэлжээ.Н.Мадурогийн дээрх мэдэгдлийн дараа Колумбийн Засгийн газар ямар нэгэн хариу өгөөгүй байна. Колумбийн Ерөнхийлөгч Иван Дуке Венесуэлийн сөрөг хүчнийг дэмжиж буйгаа удаа дараа илэрхийлж, Н.Мадурогийн Засгийн газрыг шүүмжилж байсан билээ.

Бямба гарагийн өглөө Колумбиар дамжин ирсэн аль улсынх нь үл мэдэгдэх хүмүүнлэгийн тусламжийг сөрөг хүчнийг дэмжигчид “Симон Боливар” гүүрээр давуулахыг оролдсон байна. Тухайн үед хоёр хүн гэмтэж бэртжээ.“Тэвчээр барагдлаа. Колумбийн газар нутгийг ашиглан Венесуэлийн эсрэг үйл ажиллагаа явуулахыг бид дахин тэвчиж чадахгүй” гэж Н.Мадуро хэлсэн байна.Венесуэл улс руу гадаадын орнуудаас хүмүүнлэгийн тусламж нэвтрэхээс урьдчилан сэргийлж, Колумби болон Бразилтай залгаа хилийн гол зорчих хэсгүүдийг хаагаад байгаа билээ.