101, 102, 103 дугаараас иргэд рүү дуудлага хийх боломжтой болжээ

 Мэдээлэл, шуурхай удирдлагын төвийн 101, 102, 103 дугаараас иргэд рүү дуудлага хийх боломжтой болсон байна.

Тус төв яаралтай тусламжийн дуудлага өгсөн иргэнтэй эргэж холбогдох зорилгоор 2011 оноос үүрэн холбооны оператор компанийн сүлжээндээ үнэгүй ярьдаг дугааруудыг ашиглаж эхэлжээ. Тус дугаарууд нь энгийн гар утасны дугаар тул  иргэд рүү мэдээлэл авах зорилгоор залгахад үл итгэж, мэдээллээ өгөхгүй байх тохиолдлууд гардаг байсан аж.

Иймд тус дугааруудаас дуудлага хийхэд иргэдийн утсанд тусгай дугаар /101, 102, 103/ болж харагдуулах боломжийг судлаж, үйл ажиллагаандаа нэвтрүүлэх зорилгоор Харилцаа холбооны зохицуулах хороо, үүрэн холбооны 4 оператор компанитай 5 удаа уулзалт зохион байгуулан, судалгаа, шинжилгээ, туршилтуудыг хамтран хийсний дүнд 101, 102, 103 дугаараас иргэд рүү дуудлага хийх боломжтой болов.

Дашрамд сонордуулахад, эдгээр тусгай дугаар руу тоглож залгах, утсаа шалгах зэргээр шаардлагагүй дуудлага хийх нь тухайн агшинд яаралтай тусламж шаардлагатай байгаа иргэдэд хүндрэл учруулж байдгийг анхааруулжээ.