Япон улсын хөгжлийн шилдэг загвар, туршлагыг Монголд сурталчлах асуудлыг хөндөн ярилцав
УИХ-ын дарга Г.Занданшатар Япон Улсаас Монгол Улсад суугаа Онц бөгөөд Бүрэн эрхт Элчин сайд Х.Кобаяшиг өнөөдөр хүлээн авч уулзлаа.
Уулзалтын эхэнд УИХ-ын дарга Г.Занданшатар Монгол Улсын “гуравдагч хөрш” Япон Улстай тогтоосон харилцаа, хамтын ажиллагаа Стратегийн түншлэлийн түвшинд улам гүнзгийрэн хөгжиж байгааг тэмдэглэв.
Япон Улсын Засгийн газраас 1977-2019 онд нийт 332.4 тэрбум иен буюу гурван тэрбум гаруй ам.долларын зээл тусламжийг манай улсад олгосны дотор COVID-19 цар тахлыг даван туулах арга хэмжээний хүрээнд эмнэлгийн хэрэгсэл, тоног төхөөрөмж, вакцин зэргийг нийлүүлэхэд зориулан хөнгөлөлттэй зээл, буцалтгүй тусламж олгож байгааг тэрбээр онцлов. Хүндрэл бэрхшээл үүссэн цаг үед монголчуудад тусламж, дэмжлэг олгодог Япон Улсын Засгийн газар, ард түмэнд талархал илэрхийлэв.
Элчин сайд Х.Кобаяши, "Монгол Улс бол Японы хувьд чухал түнш орон. Тиймээс Монгол Улсын хөгжил дэвшилд бид хувь нэмрээ оруулах чин хүсэл эрмэлзэлтэй байдаг. УИХ-ын дарга Г.Занданшатар та саяхан болсон Монгол Ардын Намын 100 жилийн ойн баярын мэндчилгээндээ “Япон лугаа адил хөгжье” гэсэн уриалга дэвшүүлсэн нь бидэнд сайхан санагдсан" гэв.
УИХ-ын дарга Г.Занданшатар, “Экспортын чиг баримжаатай эдийн засгийн тогтолцоо бүрдүүлж, амжилтад хүрсэн Япон Улсын хөгжлийн хэв загварыг судлан, ололт амжилтаас суралцах нь зөв гэж бид үзэж байгаа. Тухайлбал, Хөгжлийн бодлогын асуудал хариуцсан бие даасан яам байгуулж, цогц бодлогыг залгамж чанартайгаар тууштай хэрэгжүүлсэн, улс төрийн түвшний ойлголцол зөвшилцлийг бүрэн хангасан зэрэг туршлага бидэнд үнэ цэнтэй юм. Монгол Улсын экспортод уул уурхайн бүтээгдэхүүн дангаараа 90 хувийг эзэлж, мал аж ахуйн гаралтай бүтээгдэхүүн 6, аж үйлдвэрийн бүтээгдэхүүн 4 орчим хувийг эзэлж байна. Өөрөөр хэлбэл, уул уурхайгаас хэт хамааралтай улс болсон байна. Тиймээс энэ өрөөсгөл бүтцийг өргөжүүлж, үйлдвэрлэгч орон болох нь зайлшгүй шаардлага боллоо. Энэ талаар сайн жишиг, туршлага хуримтлуулсан орон бол Япон. Өнгөрсөн 30-аад жилийг эргэн харахад бидний хэрэгжүүлсэн барууны неолиберал бодлого төдийлөн тохиромжтой бус байсан нь тодорхой болж байна. Монгол, Япон хоёр бол Дорно дахины, Зүүн Азийн бүс нутагт багтдаг улсууд. Ахуй, соёл, зан заншил, уламжлалын хувьд бидэнд төстэй зүйл их бий. Тиймээс Японы хөгжлийн бодлого, төлөвлөлтийн загварыг судлах, зөвлөх үйлчилгээ авах, техникийн хамтын ажиллагаагаа өргөжүүлэхийг бид сонирхож байна. Ер нь цаашид зээл тусламж гэхээсээ илүү хөгжлийн хамтын ажиллагааны хүрээнд харилцаагаа түлхүү хөгжүүлэх ёстой гэж бид үзэж байгаа" хэмээв.
Мөн тэрээр, Японы хөгжлийн албан ёсны тусламжийн хүрээнд Улаанбаатар хотын Олон улсын шинэ нисэх онгоцны буудал, АШУҮИС-ийн дэргэдэх Монгол-Японы сургалтын эмнэлэг зэрэг хоёр орны харилцааны бэлгэ тэмдэг болохуйц төслүүд хэрэгжсэнд баяртай байгаагаа илэрхийлэв.
Элчин сайд Х.Кобаяши, "Япон Улсын хувьд Монгол Улсын олон салбарт хөгжлийн албан ёсны дэмжлэг, зээл, тусламж олгож байгаа. Тэдгээрийн дотроос хөгжлийн бодлогоор дэмжлэг болох нь бидний хувьд хамгийн чухал, завшаантай хэрэг юм. Тиймээс бид энэ чиглэлээр хамтран ажиллаж, туршлага сургамжаасаа хуваалцахад баяртай байх болно" гэлээ.
Уулзалтын үеэр Монгол, Японы парламентын хамтын ажиллагаа, ирэх жил болох хоёр орны дипломат харилцаа тогтоосны 50 жилийн ойн хүрээнд хэрэгжүүлэх ажил, Японы хөгжлийн шилдэг загвар, туршлагыг Монголд сурталчлах зэрэг асуудлыг хөндөж ярилцлаа.
УИХ дахь Монгол-Японы парламентын бүлгийн дарга Л.Энх-Амгалан Засгийн газрын гишүүнээр томилогдсон тул оронд нь УИХ-ын гишүүн Ц.Даваасүрэн тус бүлгийн дарга болсныг уулзалтын төгсгөлд УИХ-ын дарга Г.Занданшатар мэдээлэв.
