Энэтхэгийн компаниуд Монголоос коксжих нүүрс, зэс импортлох боломжийг хайж байна
Уул уурхайн яам Adani, Hindalco нарыг зэсийн нийлүүлэлтийн эх үүсвэрийг үнэлэхийг уриалсан бол Гангийн яам нь SAIL болон JSW компаниудтай коксжих нүүрс авах талаар яриа хэлэлцээ хийж байна.
Тус төвөөс Энэтхэгийн зургаан компанийг Монголоос коксжих нүүрс болон зэс зэрэг чухал ашигт малтмал нийлүүлэх зэрэг боломжит төслүүдийг судлуулахаар томилжээ. Эдгээр компаниудад зэсийн хүдэр, баяжмалын чиглэлээр Vedanta (Sterlite-ийг оруулаад), Adani, Hindalco; харин JSW болон SAIL коксжих нүүрс импортлох боломжийг судалж байна.
Төв Азийн далайд гарцгүй, Орос, Хятадтай хиллэдэг энэ орноос зэс, коксжих нүүрс тээвэрлэхэд гуравдагч талын ложистикийн түншүүдийг татах саналыг дэвшүүлсэн гэж гол яамдын хэд хэдэн албан тушаалтан Businessline-д мэдээлжээ.
Зарим яамдын баг, бизнесийн төлөөлөл Монголд ирж, боломжуудыг судалж, бизнесийн хамтын ажиллагааны хувилбаруудыг хэлэлцсэн бололтой.
SAIL компаниас албан ёсны хариу өгөхдөө «Компани нь Монголоос коксжих нүүрс авах боломжийн талаар судалж байгаа» бөгөөд худалдан авах арга, ложистикийн шийдлүүдийг «боломжтой гэж үнэлж байгаа» гэжээ. «SAIL компани нь бизнесийн стратегийнхаа нэг хэсэг болгон ханган нийлүүлэгчдийн хүрээг төрөлжүүлэх, өргөжүүлэх, өрсөлдөөнийг сайжруулах, нийлүүлэлтийн сүлжээний тогтвортой байдлыг сайжруулах зорилгоор коксжих нүүрсийг Монголоос авах боломжийг судалж байна. Худалдан авах ажиллагааны арга, ложистикийн шийдлүүдийг боломжийн хувьд үнэлгээ хийж байгаа» гэж хариуд бичжээ.
Уулзалтын үеэр ложистикийн асуудал яригдсан гэж өөр нэг албаны хүн хэллээ. Монгол Улс далайд гарцгүй бөгөөд ашигт малтмал тээвэрлэхдээ Хятадын боомтуудыг голчлон ашигладаг. «Эндээс л зарим нэг эргэлзээ төрж, яамны зарим албан тушаалтнууд Хятадаар дамжин өнгөрөх замаас зайлсхийхийг санал болгосон» гэж учир мэдэх хүн хэлэв хэмээн Businessline өгүүлсэн байна. «Албаны хүмүүс гуравдагч талын ложистикийг боломжит шийдэл болгон ашиглахыг санал болгосон бөгөөд бүх боломжийг судалж байна» гэж эх сурвалж хэлжээ.
Одоогоор Монголоос зэс тээвэрлэх хамгийн тохиромжтой зам бол Тяньжин (БНХАУ)-аар дамждаг.
Өөр нэг шийдэл бол Владивосток – Ченнаи эсвэл Владивосток – Зүүн Энэтхэгийн бусад боомтуудыг коксжих нүүрс тээвэрлэх боломжтой зам болгон ашиглах. Харин зэсийн хувьд Владивостокыг гол боомт гэж үзвэл 3000 орчим км зай нэмэгдэнэ. Владивосток руу нэвтрэхийн тулд Энэтхэгийн компаниуд ашигт малтмалыг автозам-төмөр замаар тээвэрлэх шаардлагатай болно.
