Саран дээр долоо хоногийн дотор хоёр аппарат газардана

Америкийн “Аполло” хөтөлбөрийн сүүлчийн даалгавраас хойш 50 гаруй жилийн дараа хувийн компанийн сансрын аппарат өнгөрсөн хоёрдугаар сард Саран дээр газардсан билээ. Тэгвэл ням гаргаас эхлэн нэг долоо хоногийн дотор дахин хоёр аппарат Саран дээр буухаар төлөвлөж байна.

Тэдгээрийн эхнийх нь АНУ-ын Техас муж улсад төвтэй “Firefly Aerospace” компанийн “Blue Ghost” сансрын хөлөг бөгөөд Сарны зүүн хойд хэсэгт орон нутгийн цагаар ням гарагт газардахаар төлөвлөжээ. Нэгдүгээр сард 45 хоногийн аялалд гарсан уг аппарат Сарны гадаргуугаас 100 км-ийн зайнаас гайхалтай дүрс бичлэгүүдийг хийж, Дэлхий рүү илгээсэн юм.

Ойролцоогоор усны үхэр шиг хэмжээтэй алтлаг өнгөтэй уг буугч аппарат нь Сарны хөрсийг судлах зэрэг даалгаврыг гүйцэтгэх шинжлэх ухааны арван хэрэгслийг тээж байгаа ажээ. Сарны бүтэн өдөр /Дэлхийн 14 өдөр/ ажиллахаар бүтээгдсэн “Blue Ghost” нь гуравдугаар сарын 14-нд болох Сарны бүтэн хүртэлтийг зургийг өндөр нарийвчлалтайгаар авах төлөвтэй байна.

“Blue Ghost”-ыг Саран дээр газардсаны дараа гуравдугаар сарын 6-нд “Intuitive Machines” компанийн “IM-2” хөтөлбөрийн хүрээнд “Athena” аппарат Дэлхийн дагуул дээр буух оролдлого хийнэ. Өнгөрсөн онд “Intuitive Machines” нь Саран дээр зөөлөн буулт хийсэн дэлхийн анхны хувийн компани болж түүхэнд нэрээ мөнхөлсөн юм. “Athena” эртний лаавын урсгалаар бий болсон газар доорх хэсгүүдийг судлах зориулалттай дрон, мөс хайх зориулалтай өрөмдлөг хийх төхөөрөмж, гурван явагч аппарат зэргийг тээвэрлэн хөөрсөн байна.