Соболенка, Осака, Гауфф нар шөвгийн 16-д шалгарчээ

Румыний теннисчин Елена-Габриела Русе бэртлийн улмаас Майамигийн нээлттэй тэмцээнийг орхисноор дэлхийг чансааг тэргүүлэгч Арина Соболенка дараагийн шатанд шалгарсан бол Наоми Осака, Коко Гауфф нар мөн шөвгийн 16-д тунан үлджээ.

А.Соболенка эхний сетэд 6:1-ээр хожсоны дараа Е.Русе гуяны бэртлийн улмаас тэмцээнээ өндөрлүүлсэн байна. Их дуулгын гурван удаагийн аварга А.Соболенка дараагийн шатанд Майамигийн нээлттэй тэмцээний аваргын цолоо хамгаалахаар тоглож буй Америкийн теннисчин Даниель Коллинзтой тоглоно.

Тэгвэл дэлхийн чансааг тэргүүлж байсан Японы теннисчин Н.Осака гурван цаг орчмын турш үргэлжилсэн тоглолтод Америкийн Хейли Батистыг буулган авснаар дараагийн шатанд шалгарч, дэлхийн чансааны зургаадугаарт бичигдэж буй Грекийн Жасмин Паолинитэй тоглохоор болжээ. Дэлхийн чансааны гуравдугаарт эрэмбэлэгдэж буй К.Гауффын хувьд Грекийн Мария Саккариг 6:2, 6:4 онооны харьцаагаар илүүрхжээ.

Харин Майамигийн нээлттэй тэмцээний эрэгтэйчүүдийн ганцаарчилсан төрөлд дэлхийн чансааг тэргүүлж буй Германы теннисчин Александр Зверев Британийн Жейкоб Фирнлийг 6:2, 6:4-өөр илүүрхсэнээр гуравдугаар шатанд шалгарсан байна. Саяхан болсон Индиан Уэлсийн тэмцээний эхний шатнаас хасагдсан А.Зверев дараагийн шатанд Австралийн теннисчин Жордан Томпсонтой учраа таарна. 

Эх сурвалж: МАЙАМИ /Reuters/. 
Сэтгэгдэл:
Таны IP: (3.148.182.254)